香港新浪網 MySinaBlog
« 上一篇 | 下一篇 »

破解盂蘭迷思 其實盂蘭一啲都唔得人驚!

2014年07月10日

 

好多人都覺得盂蘭節係一個好得人驚嘅節日,傳聞話農曆七月鬼門關大開,通街都係鬼;又有傳盂蘭勝會入面嘅神功戲,係做俾遊魂野鬼睇,第一場戲係凡人止步;戲棚第一行座位要留空,留番俾「老友記」坐………其實,呢啲傳聞係真係假,不如等由細細個開始,已經參與盂蘭勝會嘅西貢區潮僑街坊盂蘭勝會理事胡炎松話你知好過啦!一味以訛傳訛,唔驚都俾你嚇到驚!
文:阮芷慧     圖:鍾式明
鳴謝、部分相片提供:長春社文化古蹟資源中心、胡炎松先生(長春社文化古蹟資源中心理事及西貢區潮僑街坊盂蘭勝會理事)、西貢區潮僑街坊盂蘭勝會



喺破解盂蘭迷思前,先了解下盂蘭勝會嘅傳統。盂蘭勝會每年喺農曆七月舉行,一共三日,活動包括祭祀、燒紙錢、神功戲、派平安米、福品競投等。香港嘅盂蘭勝會通常喺公園或者球場舉行,主要有潮人(潮州)、鶴佬(海陸豐)同廣府三個唔同鄉下,內容大同小異。其中2011年,香港潮人盂蘭勝會更被列入第三批《國家級非物質文化遺產名錄》中。


傳統盂蘭勝會有戲棚,面向天地父母棚(又稱神棚),喻意表演神功戲俾眾神欣賞。戲棚左方有經師棚,右方就有孤魂台、附薦台同大士台,大士台內有十呎高嘅大士爺(又稱鬼王),用以鎮懾鬼魂。
編按:由於場地所限,每個盂蘭勝會嘅棚位擺放都會有啲唔同,但基本天地父母棚同戲棚都必須對正;而附圖中〔圖3 〕嘅資料圖片係來自香港唔同地區同鄉下嘅盂蘭勝會,以供參考。


六大迷思
迷思一: 盂蘭勝會入面嘅神功戲,係做俾遊魂野鬼睇,第一場戲係凡人止步?
解說:其實每日上演正場戲之前,的確有一齣長約半小時嘅《五福連》,不過係俾神睇,並非俾鬼睇。而且戲棚對正神棚,眾神就可以欣賞到神功戲喇。
迷思二: 戲棚第一行座位要留空,留番俾鬼坐?
解說:No!第一行冇人坐,係因為要預留俾鄉民代表、理事長、村長等嘅VIP坐,而佢哋又未必場場到場觀賞,久而久之,大家見第一行座位空咗出嚟,就誤傳為留俾鬼坐喇。
迷思三: 鬼都要供奉?
解說:供奉鬼同神同樣係積功德嘅表現,亦有消孽之意。
迷思四: 供奉儀式唔俾小朋友入去,係怕小朋友被鬼嚇親?
解說:其實係怕小朋友手多多亂咁摸,唔小心褻瀆神明,索性唔帶佢哋入去。
迷思五: 農曆七月鬼門關大開,通街都係鬼?
解說:盂蘭勝會第一日下午兩點左右,會有「發關儀式」,紙紮「值符使者」會帶一道俗稱「通行證」嘅關文被化到陰間,通知孤魂可到陽間參與勝會。由於每個地區舉行盂蘭勝會日子唔同,加上孤魂野鬼上到嚟會識去「孤魂台」受市民供奉同超度,所以佢哋唔會通街走,而且唔會成個農曆七月都通街鬼囉!
迷思六: 點解有儀式係要九十幾歲阿婆爬刀梯、走火炭路?
解說:唔同鄉下有唔同習俗,好似海陸豐信奉正一派,其中有參拜茅山師傅、齊天大聖等,儀式中有請神上身環節,搵九十幾歲阿婆爬刀梯、走火炭路,為展示刀槍不入。

 

每年一到農曆七月就有好多禁忌,有人避免去游水,有人會去盂蘭勝會供奉遊魂野鬼,做咁多嘢,只求平安度過呢個月,但只怕自己時運低,點避都避唔到。電台靈異節目主持「鬼王」潘紹聰出口成鬼,今次同我哋分享鬼古,當中更不乏佢自己嘅親身經驗。
文:wing 圖:莊振邦



中區卅間盂蘭勝會
中區卅間盂蘭勝會現場,每年都有法師進行超度同施食。某年,有一個大約10歲嘅女仔突然喺現場失控大叫、胡言亂語,仲衝入附近一個唐樓單位,結果成班法師即刻跟住跑上去,為佢開壇驅魔。據法師所講,嗰個單位嘅業主已經離世,可能因為冇人辦理身後事,令佢變成無主孤魂,而個女仔咁啱時運低,路過附近就俾佢上咗身。(唔少遊魂野鬼會喺盂蘭勝會會場附近聚集,奉勸時運低嘅你,記得要兜路行。)

一家四口公路驚魂
有年農曆七月十四,一家四口揸住架大Van去燒嘢食,當架車經吐露港公路向沙田方向行緊嗰陣,去到一個接近水警基地嘅路口,亦係交通意外黑點路段時,媽媽抱住嗰個(約1-2歲)BB,忽然指住車外狂叫狂嗌;同時,負責揸車嘅爸爸發覺,軚盤開始唔受控制,好似有股力量同佢抗衡咁,幾經辛苦先搶番盤軚,點知媽媽就同佢講:「我頭先喺車外……見到有個冇上身嘅人吊咗喺樹上。」事情仲未完結,翌年農曆七月新聞報道:有一家四口喺吐露港公路、同一路段上發生交通意外。

直播節目  疑似撞鬼
4年前喺筲箕灣盂蘭節勝會散會後做現場節目,當時係夜晚子時(約11點半),而且係8月份大熱天,直播台設喺大士台同孤魂台之間(位置請參考前一版),一路講鬼古都相安無事,直到節目尾聲嗰陣,孤魂台突然吹起好大陣寒風,而且傳出怪聲。

 

 

燒街衣燒乜鬼?
農曆七月係中國盂蘭節,相傳初一會鬼門大開,直至三十先會鬼門關,家家戶戶都會喺呢個月內燒街衣,但你又知唔知燒緊乜嘢?有咩用呢?位於深水埗嘅寶華扎作1963年開業,陪香港人度過咗半個世紀嘅盂蘭節,目前已經傳到第二代歐陽秉志(志師傅),子承父業當然對燒衣呢個習俗頗有認識啦。

先拜觀音後祭鬼
志師傅話,燒街衣必定要先拜觀音後祭鬼,所以街衣會分成兩份,先燒觀音衣俾觀音再燒街衣俾鬼,除咗以示尊重,仲要拜託佢將祭品派俾遊魂野鬼。上一輩較為傳統,對燒衣禮節好講究,現代人只會喺幾個橙上插6對蠟燭,但正確應該要點夠36對,連衣紙都要每種準備36對㗎!仲會將衣紙摺得好整齊咁逐層疊好拎去燒,底層係用元寶堆成托盤,之後就係金銀、銀紙、七言咒等無分次序鋪喺面。如果你冇試過燒衣,相信你會問,點解可以擺得咁整齊?師傅當然有秘技,就係用筆轉喇!避免幾張疊埋燒唔透。


驚撞鬼?袋塊碌柚葉啦
中國人會喺農曆7月燒街衣,唔少人誤以為同重陽節、清明節一樣,都係燒俾離世親人,但其實係燒俾遊魂野鬼。早年當局禁止市民直接喺地上燒衣,唔少家庭都相對買少咗衣紙,但志師傅就話,始終會有人堅持做到足,部分撈偏門嘅人仲會加碼「派片」,即係多買幾疊金銀派俾遊魂野鬼。相信唔少人都聽過唔好踩路邊灰,唔好游水及行路行近牆邊等傳聞,但志師傅就話,呢啲都係以訛傳訛㗎咋!不過鬼嘅嘢,信則有不信則無,師傅就遇過有客人要袋住4塊碌柚葉出街先安心,仲要用碌柚葉沐浴露沖涼辟邪咁話!

 

  • 戲棚
上演神功戲,又稱酬神戲,係市民酬謝神恩、酬神祈福,同時為自己積功德嘅儀式。

    戲棚
    上演神功戲,又稱酬神戲,係市民酬謝神恩、酬神祈福,同時為自己積功德嘅儀式。